Esefjorden Rundt

Liv Urnes frå Balestrand på veg mot mål.  Foto: Lars Jonas R. Pedersen

ESEFJORDEN RUNDT 2012 

Også i 2012 vart arrangementet avvikla i strålande sol og med sommarlege temperaturar. Til saman tok 919 turen rundt fjorden denne fine vårdagen. I år registerte vi 112 nye trimmarar. Trimmarar som gjekk rundt fjorden.(Nye trimmarar vil bli registert med det første).  68 sprang på tid: Marius Vedvik, Gaular IL fekk beste tid menn 26:22 og Hilde Aasheim, Osterøy IL var beste kvinne 29:23.

Talet på registrerte trimmarar, dvs. som har delteke før, var i år 739. Dette talet har auka jamt dei siste åra, og tyder på at fleire ynskjer å oppleve Esefjorden Rundt på nytt. Dette ser vi som ei svært positiv utvikling. Sjølv om vi ikkje klarte målsetjinga om 1.000 deltakarar rundt Esefjorden denne gongen, ligg denne målsetjinga  fast for 2013. 

Til saman tok 919 turen rundt fjorden denne fine vårdagen. Foto: Lars Jonas R. Pedersen

I programbladet 2012 fortel Johs B.Thue at bønder og strandsitjarar på "Solsiden" la tidleg om jordbruket. Det nye salsjordbruket baserte seg meir og meir på bær og frukt. Hausten var også tid for slakting og på Esegardane finn vi den lokale varianten av retten ”Haggis”. Forteljarar i 2012 har vore Turid Farnes, Gunvor Høydal, Anna Hatlem og Jens K. Ese. Ei stor takk til dykk alle! Vi rettar òg ei takk til alle sponsorane av Esefjorden Rundt 2012 frå Balestrand, Høyanger, Leikanger, Sogndal og Vik kommune. 

Takk til funksjonærar og deltakarar for vel gjennomført Esefjorden Rundt 2012.

Samstundes ynskjer vi velkomen til Esefjorden Rundt onsdag 1. mai 2013 (34. gong). 

Her kan du sjå kor mange gonger du har delteke på Esefjorden Rundt.

HISTORIA TIL VERDAS FLOTTASTE LANDEVEGSLØP

Esefjorden Rundt er 8,5 km langt og går på asfalt utan særleg høgdeskilnad. For å komme til startplassen på Tjugum, tek ein skyssbåt frå Holmen (sentrum) over fjorden. Start ved Tjugum kyrkje nær Dragsvik og mål ved festplassen "Balahaugen" ca. 1 km frå sentrum. Esefjorden Rundt vart i 2009 arrangert for 30. gong, og det vart sett ny rekord med til saman 903 registrerte deltakarar.

Esefjorden Rundt starta som eit skirenn den 1. mars i 1931 med 14 deltakarar. Gustav Eggum frå Leikanger vann det første rennet på tida 43.38 minutt. I 1947 brukte Lars L. Ese 31.00 minutt rundt fjorden og sette såleis ny rekord. Denne rekorden vart aldri slegen. Lars L. Ese er mest kjend som skyttarkonge - heile 4 gonger. Den gongen gjekk løypa etter bygdevegen rundt fjorden med start om lag på same staden som i dag. Målområdet var i Holmen der Holmatunet står no. Sigurd Kvikne sette opp ein flott sølvpokal som måtte vinnast 3 gonger. Den første pokalen gjekk i 11 år og vart til slutt vunnen av Ivar Høyvik i 1941. Siste gongen vi finn noko om skirennet "Esefjorden rundt" var i 1956.

Frå 1976 og utover vart det eksperimentert med ymse start- og målstader før løpet fann sin noverande trasé som landevegsløp i 1980. Annie Bersagel, Tjalve IL, har rekorden for damer på 29.08 minutt (2008). Svein Inge Buhaug, BUL, har rekorden for menn på 24.51 minutt (1998). Deltakarrekord var i 1986 då 276 sprang på tid.

Esefjorden er omkransa av vakre, men ville fjell. Tjugatoten 1098, Keipen 1399, Vindreken 1273 og Raudmelen 972 moh. Vegen rundt Esefjorden er også ein del av den nasjonale turistvegen over Gaularfjellet. Vi hevdar difor at vi har verdas flottaste landevegsløp. Esefjorden Rundt har gjennom åra utvikla seg til å bli ein stor folkefest. Dei siste åra har det vore aukande interesse for å vere med på landevegsløp som Esefjorden Rundt.

Helsing

Esefjorden Rundt  

Løpsinvitasjonar

Lenkjer